ياترى سامعانى

حبيت يمكن زيك ما لقيت اكيد
لكن خوفى من الايام
وغدر الساعات
خلانى اسكت اكيد
لاقولت ولا حتى نظرت
الناس ما عادت تبقى على حب
وبتنسى ان الجرح الم
وخوفى على جرحك
خلانى اسكت اكيد
واخبى فى قلبى
شوق ولهفة وانتظار
رجوع من بعد غياب
ايام بستنى الساعات
فيها تفوت واستنى لقاك
حبيت يمكن زيك ما لقيت اكيد
مانتى الغالى اللى فى قلبى ساكن
خوفى مسكتنى عن حبك
مستنى يوم م اكسر الحاجز
واجيلك دانت الغرام واخر الكلام
اكيد حبيتك علشان زيك مالقيت
كسوفك شدنى ليك
خلى خوفى يزيد عليك
لو كان الزمان يقف لحظة لقاك
كنت استنى عمرى كله
نظرة منك
سكت ومش عارف اعمل ايه
بس عينى ما بكت على اللى فات
لكن بكاها على خوفى من الايام
خلت العمر قبلك سراب
بس خوفى من انه يكون بعدك
حالة من الخيال
هو كده دايما الحب عذاب وبعد والم
ياريتنى ماعرفت الحب
بس ده حتى قبل ما حبك يسكن جوايا
وانت جوايا
بس انا كنت لسه مش شايف حبك
مع انى شايفك ملاك قدامى
سهرت كتير محتار ليك
ماهوخلاص لازم اكسر الحاجز
واتكلم بس لسه خوفى جوايا
ياترى سامعانى تريحينى وتقوليلى

الحب والعذاب

العذاب فى الحب موضوع قديم جديد متكرر جدا فالارتباط بينهما وثيق جدا لا اعرف لماذا يكون الارتباط هكذا كارتباط الضحك بالدمع وفى هذا الموقف المتسبب فى كتابتى لهذا البوست شئ غريب جدا فهو الارتباط ما بين الخوف والعذاب والصمت والفرح والحب فى آن واحد .

فالفوارق الاجتماعية تقف عائق والخوف من تقبل الطرف الثانى ايضا لهذا الحب .

فهناك من احب من هى اقل منه اجتماعيا بعض الشئ ولكنه لايهمه ذلك فما يهمه هو هى وليس وضعها جلس يفكر هل يصارحها لم يستطيع الوصول الى حل فهو يعلم حتى فى حين موافقتها حبه فاهله لن يوافقوه .

فهو يخاف عليها من كل شئ حتى من نفسه يفرح كثيرا حين يذهب اليها ليراها باى حجة كانت حتى وان كانت تلك الحجة ان يقطع ما يملك عنها حتى يراها وهو يعلم النهاية .

يخاف من ملاقاة عينيها حتى لا تفضحه عينيه . يحاول ان يقول لها ولكن خوفه من ردها يعيقه . يسهر لياليه لا ينام بسبب حب ميئوس منه فهل فعلا حب ميئوس منه .

اشياء غريبة ارتبط بها الحب ولكن السؤال الغريب الذى لم اجد له اى اجابة لماذا ارتبط الحب بالعذاب والدمع .

اشياء قد تكون صحيحة فى كثير من الاحيان لكنها متخلفة فى حالات كثيرة ايضا كالفارق الاجتماعى والفكرى .

ياترى فى حد عنده اجابة للسؤال ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ما بعد الغياب

هتكلم على موضوعين الاول جديد والتانى قديم شوية بس لازم اتكلم فيه . الموضوع الاول خاص بكاميليا صاحبة مدونة بستان زهرة الكاميليا .

بقولها الف الف مبروووووووووووووووووووك على الزواج السعيد انهارده ان شاء الله ويارب تكون الليلة انهارده سعيدة عليكى وعلى كل حبايبك يارب ومنتظرين جديدك بعد اجازة الزواج .

الموضوع التانى خاص بأبو المدونين ابو خالد ذلك البورسعيدى الذى احتل مكانته فى قلوبنا جميعا وغيابه المفاجئ من حوالى 15 يوما فما ان قرأت الخبر عند خالد همس الاحباب ووجدت مدونات اغلقت ابوابها لحين عودته ولم اكن اعلم ماذا يحدث حاولت كثيرا الاتصال به او بالقريبين منه لكنه دوما موبايله مغلق و القريبين منه لا احد يعلم شيئا شئ غريب جدا وجدتنى تذكرت تلك المرات القليلة التى تحدثت معه فيها واحسست بحنان الاب وخوفه على ابناءه فى كلماته القلية التى قالها لى تذكرت يوم حملة التبرع بالدم وجلستنا فى نادى الزراعيين وكلماته التى همس لى بها ونحن خارجين من صلاة ظهر الجمعة . تذكرت يوم ان كنت فى القاهرة ليختبر ابن عمى فى كلية الشرطة وهاتفته على تليفونه واجل رجوعه لبورسعيد خصيصا لمقابلتى فى البورصة . تذكرت كلماته التى اسدى بها النصح لابن عمى كى يستطيع العبور من اصعب امتحانات القبول فى كلية الشرطة وكانت كلماته سببا فى ان ينجح فى الاختبار . تذكرت وعده لى بالذهاب الى المنيا مدينتى وعقد لقاء يجمع ما بين المدونين وشباب الفيس بوك هناك وكان محددا ان نبدأ الاستعدادات خلال تلك الايام . وجدتنى افتقد شئ كنت ارتكن اليه كثيرا كنت اقرأ كلماته التى يكتبها عن بورسعيد وايام المقاومة . تذكرت الكثير والكثير مع انى لم اجلس معه سوى ثلاث او اربع مرات ولكن كلماته كان لها الكثير والكثير من التأثير على حياتى .

فوجئت بذلك الغياب المفاجئ وعلمت لماذا لم يرد على رسالتى لتهنئته بالعيد فهل يريح قلوب الجميع ويعود ابو المدونين هل يخرج من الشرنقة ليطمئن ابناءه . فجميعنا يحتاج له ولكلماته .

اخيرا احب ان اطمئن من يهمه امرى انى بخير ولكن طول الغياب عن المدونة بسبب ظروف العمل وطلبى البسيط منكم ان تدعوا لى ان يوفقنى الله . واعتذر للكثير ممن قصرت معهم فظروف عملى صعبت علىالكثير والكثير مما كنت افعله حتى وقت قريب ولكنها تلك هى الحياة .

دعاء ما بين الأهلة

راح هلالك يا رمضان وراحت معاه اجمل ايام

هل هلالك يا شوال ورجعت معاه الايام

وبين الاهلة ليا احبة بدعى ربى

يسعدهم ويهنيهم ويغفر لهم

ليا احبة حبيت بالعيد اهنيهم

كل سنة وانتم طيبين وبكل خير وسعاده

( R-A-N-D-A)إهداء الى

فى الأول بعتذر لناس كتير على تقصيرى معاهم بس انا فعلا والله غصب عنى - عموما انا بقول لكل الناس كل سنة وانتوا طيبين خلاص العيد قرب وياريت محدش يكون زعلان منى بس بطلب منكم كلكم تدعولى ودلوقتى استكمالا للبوست اللى فات بهدى حاجة كده جت فى دماغى لاحلى واجمل وارق واحن حد قابلته فى حياتى كلها بهديها لراندا اللى بجد مش عارف اوصفها بايه مهما اتكلمت مش هعرف اوصفها بأى شئ ومن هنا بقولها ميرسى ليكى راندا ميرسى لكل حاجة بجد وبدعيلها وبدعى لكل الناس معاها ان ربنا يكرم الجميع ويسعدكم يارب

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

من زمان وانا وحيد
عدى عليا من الصحاب كتير
دقت نار الغدر والعذاب منهم كتير
واخترت ارجع وحيد
لما طال يأسى من قلوب بتخدع ولا بتحن
كل اللى فيها الغدر
وطال صبرى كتير ورضيت بالنصيب
لقيت القلب المليان بالحنان
بيرفرف على سمايا من بعيد
قربت وقرب هو كمان
وكانلى فيه الامان دلوقتى مبقتش وحيد
خلاص لقيت الحنان فى صاحب
خلاص مبقتش وحيد
فكرت اهديه حاجة وهديته كلمة لقيتها قليل
عدى الزمان وراح اللى فات
دلوقتى مبقيتش وحيد
لقيت الصاحب اللى بدور عليه
طول الزمان يكون هو الانيس
مش عارف لحد دلوقتى الاقى وصف
اوصف بيه الصديق
لو قلت هو الام والاب قليل عليه

وبعد الام ايه
عرفت معاه معانى كتير
لحب الناس والحنية الطيبة
احساس غريب كأنه احساس
الام للولد ولا الاخوات كمان
مش عارف الاقى وصف للصديق
بس عرفت معاه معانى كتير
عرفت انك مهما ضعت فى حياه
الغدر والزيف والحرمان
هتلاقى قلب صديق
يرجع بيك لبر الامان
هو الصديق الامان ومرايا
عمرها ما تخدع بمظهر ولا بالالوان
ولا بتغير من شكل الانسان

هو المكان والزمان

ده الصديق

مش اى انسان

مدونين فى حياتى

بوست كان لازم ينكتب من زمان عن مدونين فى حياتى غيروا فيا كتير اتأثرت بيهم ومنهم ناس وقفت جنبى فى حاجات كتير . اول حاجة هتكلم عليها الناس اللى اثرت فيا من بعيد يعنى من غير تدخل مباشر فى حياتى .

1- احمد الصباغ واحد من الناس اللى بعزهم قوى مع اختلاف الاراء حوله الا انى اعتز بيه جدا بحب قوى اقعد اتكلم معاه

2- نضال او توأمى زى ما فى ناس بتحب تسمينا يمكن لاننا شبه بعض فى حاجات كتير وقريب منى قوى

3- سووو بقفشاته اللذيذة ودماغه الصعيدية الا انه يدخل القلب بسرعة غريبة متعرفش ليه تحس انه قريب من كل حد

4- محمود الدوح بخفة دمه وبساطته يخليك تحبه بسرعة قوى

5- خالد همس الاحباب جدع وابن بلد قوى وقف جنبى فى القاهرة لما كنت بشتغل هناك وكنت بحب اروحله الكافيه بالليل ونقعد مع بعض نحكى

6- بابا ابوخالد بحس انه اكتر من والدى بسيط فى كلامه قريب مننا كشباب تحس بحنيته وفكره الجميل قوى بستفيد منه لما بنقعد نتكلم بحس بالحنان المفقود قوى لما يشوفنى و يضمنى فى حضنه

7- احمد على الحاضر الغائب دوما شخصية تجذبك عاشق لمصر جداااااااااااااااااااااااا يأسرك دوما حديثه ومجالسته

8- ولاد بلدى الاتنين بقى حماده زيدان وهيثم الكاشف عيال جدعان بصحيح بحب اقعد معاهم قوى يمكن الظروف بتبعدنا احيانا بس يا سلام لما نتقابل

9- آبى هانم بتنجانى بنوتة لذيذة تشوفها تحس انها شايلة الدنيا فوق دماغها لكن لما تتكلم تحس انك بتتكلم مع حد عنده 50/60 سنة

10- ميرا المرأة التى تحمل عقل الرجل خفيفة الدم وعقلها كبير قوى مع انك تشوفها تقول دى عيلة

11- داليا قوس قزح دماغها كبيرة قوى وطيبة قوى بحس انها تشبه لأختى بتحب تساعد من غير ما تستنى حاجة

12- شهرزاد مع انى لاشوفتها ولا اتكلمت معاها على الايميل الا انى بستنى كومنتاتها قوى لانها بتتكلم فى النقطة الصح وبحب اسلوبها قوى

13- فتافيت الكلام وحدتها زى وحدتى بحب اسمع منها واتكلم معاها

14- نهر الحب البورسعيدية اللى شدتنى دماغها وفكرها قوى فى المرة الوحيدة اللى قعدنا فيها مع بعض

15- نيجى لآخر حد وانا قصدت انى اخليه فى الاخر علشان يكون مسك الختام مش عارف اوصفها بايه اقول ماما ولا اختى ولا صاحيتى لأ دى حاجة كبيرة قوى راندا افضل من قابلته فى حياتى وقفت جنبى اول ماشوفها على الماسينجر بحب اجرى عليها واحكيلها على كل حاجة بحس بالراحة قوى وانا بحكى ليها وباخد رأيها فى حاجات كتير مش يعرف عنها حاجة حتى اقرب الناس ليا بثق فى رأيها جدا بجد مهما كتبت وقلت مش بقدر اوفيها حقها .

مش هما دول كل اللى اعرفهم لكن دول اكتر ناس قربتلهم وقربوا منى وبستريح قوى وانا معاهم هما دول اخواتى المدونين اللى بدعى من كل قلبى لرب العالمين واحنا فى اقرب الايام لبابه انه ربنا يديم معزتنا ومش يفرقنا ابدا وبدعى لربى يكرمهم ويفرح قلبهم دايما

م الحب وللحب

ليه فرحان قوى

فى عز

م انا مخنوق قوى

بشوف ضحكتك بنسى زعلى

بتكلم معاك بنسى دنيتى

ليه وانا بصلى برفع ايدى

وادعيلك

فى صلاتى وقيامى

فى ركوعى وسجودى

بدعى واقول يارب

ليا حبيب خليه من نصيبى

خلى قلبه يحس بيا

بدعى واقول يارب

انت اللى عالم بيا

واللى جوه فيا ليه

يارب احميه وصونه

وخليه ليا

ليه الكون فرحان بيغنى

والنجوم مبتسمة

ده حتى القمر بنوره

مالى سمايا بفرحه وشوقه

اتارينى حبيت وحسيت معنى الامان

زمان كان قبله ليه

حزن .. جراح ..الآلآم

اتارينى مكنتش حبيت

دعيت ليك يارب دعايا

اقبل منى يارب

وانت القادر على تحقيق منايا

عدينا اول يوم فى رمضان

انهارده تانى يوم من رمضان ياترى عملنا ايه فى اول يوم حياتنا اتغيرت ازاى ايه اللى ضفناه وايه اللى افتقدناه .

انهارده واحنا بنبدأ يومنا الجديد حاسبنا نفسنا على اول يوم ولا لسه .

ياترى اللى اتغير فينا مظاهر يعنى شكلنا لبسنا طريقة تعاملنا ولا اتغيرنا تغيير حقيقى يستمر لبعد رمضان .

كلنا بنفتكر رمضان بالصيام والالتزام بالصلاه لكن رمضان عمره ما كان كده رمضان عادات فيها الكويس اللى نتمنى انه يستمر طول السنة زى صلة الرحم والمودة وفيها الوحش اللى نتمنى اننا منشوفوش تانى لا فى رمضان ولا غيره زى الكسل .

علشان كده كل واحد فينا لازم يقعد مع نفسه ويشوف رمضان بيمثله ايه لو بيمثله حاجة كويسة يلتزم بيها طول السنة لو شئ مش كويس ياخدها فرصة انه يقلع عن الشئ ده .

ياريت لو كل حد مزعل حد منه زى الحبيب اللى مزعل حبيبه والصديق اللى مزعل صديقه والاخوات اللى زعلانين من بعض يتصالحوا وميكونش علشان خاطر رمضان وبس لأ لانه ده حق عليك من عند ربنا حق الاخوة والصداقة حق الابوة والامومة حق الحبيب وحق الابناء حق الزوج والزوجة كلها حقوق بنناسها باقى السنة الافى رمضان طيب ليه متكونش طول السنة .

اللهم تقبل صيامنا وقيامنا . اللهم إهدينا للخير اجمعين . اللهم جمع كل بعيد وقرب كل قريب . اللهم اعنا على طاعتك

قولوا معى آمين

فضفضة

عارف

لما يبقى حلمك قدامك ومش شايفة ...النور موجود وانت شايف طريقك ضلمة ...حياتك بإيديك ومش بإيدك...بتمر الثوانى زى الساعات ...حزنك هو حياتك مع ان فرحك قدامك

عارف

لما تكون ماشى فى طريقك وفى نفس الوقت واقف مكانك .... لما تكره كل حاجة وانت حابب كل حاجة .... لما يكون النهار زى الليل .... والبرد زى الحر

عارف

لما يكون الدمع هو ونيسك مع ان الضحكة فى عنيك ..... لما يكون الحنان قدامك ومش شارب منه .... لما القمر يساوى الشمس .... والجوع هو الشبع

بتكون عايش فى العدم والامل جواك انكسر مع حلم اندثر فى ليل عليل من غير فجر قريب هو ده حالى فى زمن مالوش امان قدره نكون وسط العذاب واحنا شايفين الجنة هناك ولا يوم بنحاول نكسر الشباك وننط السور خايفين من النور

النيل هيرقص معانا

كتبت نحلم ايام زمان

وانا لسه بحلم بدا اليوم

واهو خلاص اتحقق الحلم

قولت طول ماحنا عايشين

اكيد هنكون قادرين

وقالولى اكيد هنكون قادرين

بس تيجى لينا الفرصة

واهى جت وابتدت بمشروع وطن

قولنا فيه احنا مين

احنا اللى جاى احنا الامل

انهارده مصر فى قطعة جاتوه

حلم موجود فى ايدينا

بس ياريت لو الجاتوه

من غير شيكولاته

اصلها لونها غامق

بلون ايام زمان

لكن دلوقتى الجاتوه بقاله طعم بلون

فاتح بلون الحلم والنيل

النيل اللى بيجرى جنبينا فرحان

بولاده فرحان بالحلم

............

حلمت وكتبت

حلم معايا كتير

قالوا انتوا مين

قولنا احنا الولاد السمر الشداد

احنا البنات ام الضفاير

احنا اللى جاى

احنا ولادك يا ارض النيل

يا أمى وام المصريين

احنا ولادك يا مصر

احنا الناس اللى فى الوادى

واللى تحت الجبل

احنا ولادك يا مصر

............

حلمنا وحققنا الحلم

ومش هنبطل نحلم

طول ماحنا عايشين

ولا هيموت الحلم جوانا

طول ماحنا قادرين

مبروك لكل اللى حلم حقق الحلم مبروك لكل مصرى لسه جواه امل انه يكون مبروك لينا الامل فى دنيا من غير الامل

نحلم

نحلم واحنا عايشين نحقق حلمنا قادرين
طول ماحنا فاكرين المجد اللى كان
والصبر مع الزمان يبقى احنا اكيد قادرين
نحقق الاحلام ونرجع اللى كان
طول ماحنا عايزين يبقى احنا اكيد قادرين
نحقق الاحلام واحنا عايشين
الحضارة والمجد فى دمنا من زمان
يبقى احنا اكيد قادرين
نحقق الاحلام واحنا عايشين

يااااااااااااه 19 يوم

fs انهاردة راجع ليكم من بعد غياب 19 يوم بسبب ظروف الشغل والبيت علشان كده ممكن يكون البوست طويل شوية لكن استحملونى انا هتكلم على يوم من اجمل ايام عمرى وهجاوب الامتحان اللى بعتتهولى الصديقة الجميلة شهرزاد .

يوم الجمعة 1/8/2008 اكيد كلنا فاكرينه اليوم اللى اطبق فيه قانون المرور الجديد بس انا مكانش مرتبط معايا بقانون المرور لأ انا ارتبط جوايا بحملة التبرع بالدم ونادى الزراعيين ( مع ان والدى مهندس زراعى الا انى اول مرة ادخله ) نزلت القاهرة من يوم الخميس الصبح ومنمتش ليلتها خالص مستنى ميرا ترن عليا الصبح علشان نروح مع بعض كنت عامل زى الاطفال الصغيرة ليلة العيد فرحان قوى انى هتجمع مع الناس اللى بحبهم انى هقضى معاهم يوم كامل وجه الصبح ونزلت روحت انا وميرا وشيكو وصلنا ودخلنا المركز علشان نتبرع ( مع ملاحظة انى مكنتش من المتبرعين ) وكان تجمع جميل جدا لناس كتير بحبها وناس اول مرة اشوفها بس كنت سعيد جدا انى شفتها زى احمد كمال والشنكوتى ونيجرو ودعاء مواجهات وايناس نهر الحب وشيماء الجيزى وشيماء فضفضة وفنانة مفروسة ورئيسة حزب الاحلام وشاهى ومهاميهو وضياء وبعد التبرع اشتغلت بطوط بتاعة ابى اسعاف كانت بتودى ضحايا التبرع على نادى الزراعيين وروحنا على صلاة الجمعة اللى اول مرة اصليها وانا مبسوط قوى طبعا البنانيت قعدوا فى نادى الزراعيين واحنا رحنا صلينا فى جامع جنب النادى واحنا راجعيين دار حوار صغير قوى بينى وبين ابو المدونين ابو خالد عن اختصاصى ومدى الاستهانة بمهنة الاخصائى الاجتماعى فى مصر مع الفارق بين الدول العربية والغربية وكان حوار جميل جدا حسيت فيه احساس غريب جدا حسيت انى بتكلم مع والدى بحنيته وطيبته وعقليته العظيمة .
بعد العودة مرة اخرى للنادى احتفلنا بعيد ميلاد سو ولماضة على خلفية طلقات مسدسات الصيد التى تأتى من نادى الصيد المجاور لنا وبعد وصلات الضحك على بعض المواقف الكوميدية اثناء الاكل طبعا انصرف البعض لظروفهم وفتحت ايناس نهر الحب نقاش حول موضوع اراه غاية فى الاهمية ( لكن لى رأى خاص ان الموضوع متمش طرحه بالصيغة الصحيحة وده اللى هشرحه بالتفصيل فى بوست قادم ) وكان الموضوع عن العنوسة بمفاهيم تعددت بمعنى الابتعاد الفكرى ما بين المتزوجين ومفهوم العنوسة لدى الناس ومعدلات الطلاق والزواج وتعرضنا لمناقشة فكرة غادة عبد العال ( انا عايزة اتجوز ) وفكرة جروب (عروسة من غير شبكة) على الفيس بوك وطال النقاش ولم يتم الاتفاق على صيغة معينة سوى تناول الموضوع محل النقاش فى بوستات منفصلة لكل منا مع ان ايناس كان لها افكار ( اراها بعيدة عن الواقع العملى بعض الشئ ) لكن النقاش فى مجملة كان شئ اكثر من الرائع .
واخيرا ما استفزنى بشدة انى تركتهم قبل انتهاء ذلك اليوم الرائع لالتزامى بارتباطات عمل فى المنيا وكان لزاما على ان اسافر مبكرا.وبذلك انتهى يوم من اجمل ايام عمرى .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثانى موضوع اجابة الامتحان بتاع شهرزاد:-

الامتحان بيقول ايه ---

بيقول اذكر ستة اسرار اللي يشوفنا لاول مره ميعرفهومش عننا :-

الاجابة بقى هتكون ايه :( يالا هغششكم طباعى وامرى لله )

1- عصبى

لما بشوف حاجة بتنرفزنى مع انى مش بيبان عليا كده خالص

2- كتوم

مبتكلمش كتير وبشيل احزانى لوحدى

3- رومانسى

كتير بيتعامل معايا بيحس انى لوح ثلج لكن لما بحب بحب باخلاص

4- بخاف من الفشل

يمكن ده بيدينى دافع انى انجح لكن كتير بيوقفنى مكانى

5- عنيد

كتير بعاند بس فى الاخر بيتضح انى كنت صح لكنى عموما محب انى اكون حر نفسى

6- مرح

كتير بيشوفنى بيقول انى خجول جدا ودايما حزين ودى فعلا صفة فيا لكن فى اول مقابلة بس والحزن شئ عادى بالنسبالى مصاحبنى دايما لكنى بحب الحياة والتنطيط

" عفوا لقد نفذت الاسئلة برجاء شحن البلوجر "

خلاص خلصنا وبالنسبة انا ههدى الامتحان ده لمين

انا مش ههديه لحد علشان الامتحان ده سهل قوى استنوا لما تيجى حاجة اصعب

هوزعها for free .

شباب عين شمس الرائع

اثناء قرائتى لمقالة ابراهيم حجازى فى جريدة الاهرام كعادتى يوم الجمعة وجدت رسالة اليه من شباب جامعة عين شمس وجدت انه اقل ما افعله هو ان اكتب عنهم وعن تجربتهم الرائعة التى اتمنى ان يطبقها كل شباب مصر .

هم شباب جمعتهم الدراسة وحب مصر والإيمان بها انطلقوا يحلقون بعيدا عن حملات التيئيس المنتشرة في مصر.

هم شباب ككل شباب مصر دخلوا كليتهم متخيلين إن الدنيا وردية وان الأرض طوعا لهم. صدمهم الواقع كما صدم الكثير من شباب مصر بعد إنهائهم دراستهم وكما ذكر على لسان إحداهم في رسالتها للكاتب الكبير إبراهيم حجازي ( صدمنا بأول واقع تمنينا ألا نراه. مصر بلدنا الحبيبة متخلفة في مجالات التكنولوجيا بل وليست حتى في بداية الطريق هل لك أن تتخيل مهندسا متخرجا في كلية الهندسة و جامعة عين شمس التي تعتبر من أصعب كليات الهندسة في مصر. مهندس لا يستطيع أن يحمل في يده كاوية بمعنى اصح لا يستخدم إلا القلم الرصاص ومثلث أرسطو لا علاقة له بالمفكات وما إلى ذلك )
قبلهم أجيال استسلمت للواقع ولم تسعى لفعل شئ وكان من الممكن أن يستسلموا كسابقيهم ولكنهم لم يستسلموا فقد جمعتهم فكرة........ نعم إنها مجرد فكرة ولكن أفضل ما فيها إنهم نفذوها تحدوا واقعهم وفعلوها ويريدون أن يصلوا بها لجميع شباب مصر.

فكرتهم بكل بساطة كانت عبارة عن إقامة مسابقة نعم مسابقة ولكنها ليست كأي مسابقة تفاصيلها كالآتي:-
أقاموا مسابقة أسموها كورد ( Cord ) وهى اختصار (Competition Of Robot Design) وهى تهدف إلى صنع إنسان آلي بأبسط المواد الخام وأقل التكاليف وكان التحدي وأقاموا مسابقتهم السنة الماضية في كليتهم على عجل ونجحت كما لم يتوقعوا. فعلى الرغم من المجهود المضني والعمل الشاق قالت في رسالتها ( كدنا نبكى حين وجدنا الإنسان الآلي الذي صنعناه يتحرك وينفذ مهامه ويفوز واهم ما في الأمر إننا تعلمنا أن نمسك الكاوية وان نفشل عشرات المرات إن لم يكن مئات المرات ) لكنهم في الآخر نجحوا.

المفاجأة أن الإنسان الآلي الذي فاز بالمركز الأول تكلفته 18 جنيها فقط. الفكرة بدأت من عند محمد الرافعى
( رابعة هندسة ) وأقيمت المسابقة بالفعل السنة الماضية وكان موضوع التنافس والسباق صناعة إنسان آلي.
هذه السنة تقام المسابقة يوم 15 أغسطس المقبل و تضم أربعة سباقات والمطلوب أكثر تقدما وتعقيدا.
الأستاذ إبراهيم حجازي يقول ( النتيجة بإمكانى أن أتوقعها وستكون بإذن الله أكثر روعة وإبهارا )
طلبة هندسة عين شمس اكتشفوا أن أحدا لا يريد رعاية مسابقة علمية فهي ليست مسابقة في الرقص وليست إحدى مسابقات الهلس لا احد يريد الرعاية لان الموضوع علم وتكنولوجيا وقيمة.
الأستاذ إبراهيم حجازي يتساءل ويتعجب ( أتعلمون المبلغ المطلوب لرعاية مسابقة لصناعة إنسان آلي ؟ المبلغ عشرة آلاف جنيه !!!!!!!!!)

كان ذلك ما فعله شباب عين شمس وهنا أنا لا اطلب منكم رعاية المسابقة ماليا ولكن مجرد وقوفنا جانبهم بمجرد الكلمة التي نكتبها والاحتفاء بهم والنماذج المشابهة يعطيهم دفعة معنوية أقوى من اى شئ آخر.

انا بحاول حاليا الوصول للمجموعة صاحبة الفكرة وعقد لقاء معهم والمدونين لشرح فكرتهم باتساع فهل من يؤيدنى

رسالة

بينما اقلب في أوراقها
بينما ابحث عن نسمه
منها تقول لي بحبك
وجدت رسالة
رسالة تحمل اسمي معاني الحب
رسالة تعتذر فيها عن شئ لم يكن
بإرادتها ولا بإرادتي
تعتذر
هنا كان إستغرابى
فهي في رسالتها محت
كل خجلها كأنثى لتقول
لمن عشقته
أنها تحبه
وفكرت كثيرا وبحثت كثيرا
ففي رسالتها شئ إقتحمناه معا
ولكن هل أنا المقصود
باعتذارها
هل أنا من تقول له
إنها تحبه
فكرت كثيرا
فهي لم تصارحني بها قط
وكنت اعلم انى قريب من قلبها
وهناك الكثير يحبها بل يعبدها
لكن هل أنا المقصود
فأنا من صرحت بحبي
ولم أجد ردا
فهل يكون أنا
طويت رسالتها وسألتها
فلم تجبني
بل ذادتنى حيرة
حين قالت
لا لن أجيبك
بل سأتركك تفكر وتحتار
حبيبتي ومعبودتي
مليكتى ومعشوقتى
هل أنا المقصود باعتذارك
أم غيري
اجيبينى يا عمري
فعمري توقف عليك
لا تتركيني في حيرتي
ازداد كل يوم
حيرة فوق حيرتي
وأنا اعلم
ولكنى اريدها صريحة منك
علها تشفى قلبي العليل
من حيرته
وتحيى فيه أمله في هذه الدنى

اليوم الجديد

حينما ازف الليل بالرحيل
انتظرت قدوم الفجر بيوم جديد
اتى الفجر وما نادى باليوم الجديد
وجدتنى التقى ذاتى
اتذكر يوم ان كان لى حبيب
اتذكر يوم غياب الصديق
فكم من ليل ازف بالرحيل
وما اتى الفجر بيوم جديد
غاب عنى حبيب
آخذا معه نور الفجر الجديد
ظللت فى الليل انتظر الرحيل
ولكن الفجر لم يأت باليوم الجديد
فقدت الصديق
وانا فى الليل انتظر انبلاج الفجر
طال الانتظار
ولم يأت الفجر بيوم جديد
كم من ليل مر على ذاتى
وفجر أتى بخيالى
ولم يظهر نور اليوم الجديد
مللت الانتظار
مللت ظلمة الانكسار
وطلبت الرحيل
لكن الفجر أبى ان يأت
ومعه لم يأت نور اليوم الجديد

المدونات وتحقيق الذات لدي الشباب

مقالة قرأتها ورأيت انها تمثل واقع ولأول مرة اقرأ فى جريدة رسمية ومن مسئول مقالة تطالب التفاعل مع المدونين بل وتتحدث بأسلوب راقى بعيدا عن محبى الصخب والهلس والهجوم دون النظر للجوهر .

لقد قرأت تلك المقالة فى جريدة الاهرام التى هاجمت المدونين من قبل بقلم الدكتور على الدين هلال وزير الشباب الاسبق الذى مازلت اعتبر ان ذلك الرجل لديه فكر محترم وراق منذ ان كان وزيرا وله العديد من المواقف المساندة للشباب ذلك رأيى فيه الذى سجلته عن بعد من مركز الاحداث ولكن بعيدا عن ذلك دعونا نقرأ مقالته التى تحمل ارقام لها دلالات هامة وينهيها بتساؤل غاية فى الاهمية .

انتشر تعبير الفضاء الإلكتروني للدلالة علي هذا العالم الافتراضي الواسع الذي يرتبط بالاستخدامات المتعددة لشبكة الإنترنت والتي تشمل المواقع الإلكترونية والمدونات وأنشطة التجارة الإلكترونية والطب الإلكتروني والتسويق الإلكتروني إلي غير ذلك من مجالات الحياة‏,‏ ويمكنك أن تجد علي الإنترنت ليس فقط الجرائد اليومية التي تصدر بكل لغات العالم ولكن ايضا جرائد ومجلات يقتصر وجودها علي الشبكة فقط وكذا آلاف الكتب التي صدرت بشكل ورقي ويمكن الاطلاع عليها وطبع نسخة من علي الإنترنت.‏ ‏

ومن اهم مجالات هذا الفضاء الالكتروني مجال التدوين والمدونات ويقصد بالتدوين قيام شخص أو مجموعة من الاشخاص بتدوين مايعن له من أراء وأفكار وتسجيل اجتهادات وتبني مواقف بشأن القضية التي تهمه ودعوة الآخرين الي التعليق عليها‏.‏ والتدوين ظاهرة حديثة يعود ظهورها الي عام‏1996‏ أي من‏12‏ عاما فقط ثم سرعان ماانتشرت في كل ارجاء الدنيا‏,‏ لذلك‏,‏ احسن مركز المعلومات ودعم اتخاذ القرار بمجلس الوزراء عندما نشر دراسة بعنوان‏:‏ المدونات المصرية فضاء اجتماعي جديد وذلك ضمن السلسلة الشهرية المهمة التي يصدرها بعنوان تقارير معلوماتية ‏

وتضيف هذه الدراسة الكثير لكل المهتمين والمراقبين للتغيرات الجوهرية التي تحدث في البنية التحتية لمصادر الثقافة والتعلم والتعبير والحوار بين الشباب المصري‏.‏ وفي مجال تحليل هذه الدراسة واستخلاص بعض نتائجها المهمة يمكن التركيز علي اربعة موضوعات‏.‏

‏
أولها:‏ ان التدوين هو تعبير مباشرعن الذات فالمدون يعبرعن فكره وانطباعاته وردود فعله ويمارس حريته بشكل مستقل عن أي فرد آخر‏,‏ ويستطيع ان تكون له مساحته ومجاله الخاص به علي الانترنت والذي يستطيع من خلاله أن يعبر عما يختلج بداخله من مشاعر وأحاسيس ومن اهتمامات وأولويات‏,‏ التدوين يعبر أيضا عن رغبة في المشاركة وعن سعي للتواصل مع الغير‏,‏ فالشخص الخامل او السلبي أو غير المهتم بقضايا عامة او هذا المنكفيءعلي ذاته عادة لايقوم بالتسجيل والتدوين‏.‏ ‏

المدونات بهذا المعني هي تعبير عن الحرية الشخصية للانسان وكأي حرية فإنها تطرح إشكالية العلاقة بين حرية الفرد وحرية الآخرين والمجتمع‏,‏ وهل يكون من حق الفرد وهو يعبر عن فكره أن يسيء او يحتقر حريات الآخرين ومعتقداتهم‏,‏ أضف الي ذلك مايحدث احيانا من خلط واضح في بعض المدونات بين المعرفة والمعلومات من ناحية وتداول الشائعات التي لاتستند الي أي اساس من ناحية أخري‏.‏ وقد كان هذا الموضوع مجالا لحلقة نقاش مهمة نظمهاالمجلس القومي لحقوق الانسان ‏

وثانيها‏:‏ان التدوين ظاهرة عالمية‏,‏ فحسب الدراسة فإنه يوجد عدد‏70‏ مليون مدونة في العالم وذلك في ابريل‏2007‏ ويزداد هذا الرقم بعدد‏120‏ الف مدونة جديدة يوميا اي‏84‏ مدونة في الدقيقة الواحدة‏,‏ وخلافا لما قد يتوقعه الكثيرون‏,‏ فإن اكبر عدد من المدونات مكتوب باللغة اليابانية‏(37%)‏ يليها الانجليزية‏(36%)‏ أما المدونات باللغة العربية فإنها لاتمثل سوي‏(0.7%)‏ من اجمالي المدونات في العالم‏.‏ ‏

ولم تكن مصر استثناء من هذا التطور فبدأت أنشطة التدوين فيها عام‏2001‏ ثم انتشرت بعد ذلك بسرعة كبيرة واتجه قطاع من الشباب لاستخدامها كأداة للتعبير عن انفسهم ومواهبهم ومواقفهم وقدراتهم‏,‏ ثم تطورذلك الي التوظيف السياسي لهذه المدونات كانعكاس لحالة الحراك السياسي التي تشهدها مصر من عام‏2005.‏ وفي أبريل‏2008‏ بلغت المدونات المصرية عدد‏160‏ ألف مدونة بنسبة‏(30.7%)‏ من إجمالي المدونات العربية و‏(0.2%)‏ من المدونات علي مستوي العالم‏.‏ ‏

وثالثها‏:‏ ان المدونات المصرية ظاهرة شبابية ترتبط اساسا بمدينة القاهرة‏,‏ فتشير الدراسة ان عدد المدونين المصريين بلغ‏162.2‏ الف تقع الغالبية العظمي منهم في الشريحة السنية من‏20‏ ـ‏30‏ سنة‏,‏ وأن‏(82.1%)‏ منهم يقيمون في القاهرة بينما يوجد‏(11%)‏ في محافظات الوجه البحري و‏(6.8%)‏ في محافظات الوجه القبلي وهكذا فإن مؤشرات التمايزالتعليمي والاقتصادي والاجتماعي والاقليمي تظهر بوضوح في هذا التوزيع‏.‏ ‏

ورابعها‏:‏ ان المدونات المصرية متنوعة الاهتمامات والأولويات وغير صحيح أنها ذات طابع سياسي في المقام الاول‏,‏ فالمدونات ذات الطابع السياسي تمثل‏(1809)‏ من اجمالي عدد المدونات بينما تتوزع المدونات الاخري علي الاهتمامات ذات الطابع الشخصي والفنون والآداب والقضايا الاجتماعية الاخري‏,‏ ومن الملاحظات المهمة ان المدونات ذات الطابع الديني لاتتجاوز نسبة‏(7%)‏ وذلك خلافا لنسبة الكتب الدينية في مجال النشر أو النشاط الديني بصفة عامة في المجتمع‏,‏ كما يلاحظ ان المدونات التي تهتم بالعلم والتكنولوجيا تمثل‏(4%)‏ فقط وهو مايشير الي مكانة هذا المجال بين المدونين‏,‏ كما يلاحظ اخيرا ان‏(67.8%)‏ من هذه المدونات مكتوب باللغة العربية التي تختلط فيها العامية بالفصحي أما البقية فهي إما مكتوبة باللغة الانجليزية او بخليط من اللغتين‏,‏ ويعكس ذلك حقيقة ان نسبة‏(20.8%)‏ من المدونات المصرية يتم تدوينهافي دول اخري غير مصر‏.‏ ‏

لقد تزايد الاهتمام بالتدوين والمدونات واصبحت مجالا مهما للحوار والتفاعل بين الشباب‏,‏ وعدد الشباب المتابعين والمنخرطين في هذا النشاط يتزايد يوما بعد يوم‏.‏ وهو عادة من الشباب المتعلم الراغب في المشاركة والتعبير والمتطلع إلي مزيد من الانجاز الشخصي والعام‏,‏ والمجتمعات الناهضة لاتضع نفسها في تناقض مع تلك النخبة من شبابها ولكنها تسعي إلي بناء جسور التواصل وإيجاد لغة مشتركة للتفاهم والنقاش معهم‏,‏ والسؤال هو‏:‏ هل هناك شباب غاضب علي صفحات المدونات ؟ الإجابة نعم‏..‏ وهل توجد اسباب مفهومة لهذا الغضب ؟ والإجابة ايضا نعم‏..‏ ويبقي ان مسئولية المجتمع والاجيال الاكبر سنا والاكثرخبرة هي ادارة الحوار مع هؤلاء الشباب في الفضاء الالكتروني ومن خلال التفاعل مع المدونات والمدونين حتي يتم توجيه طاقة الغضب والحماس الي مسارات بناءة تساعد علي تحقيق مستقبل افضل لكل واحد من هولاء الشباب‏.

الى هنا انتهت مقالة الدكتور على الدين هلال ولكن هل من هناك من يحلل دلالاتها ؟

كلام .......... والسلام ( وجهة نظر )

بعيدا عن ايجابيات وسلبيات يوم 6 ابريل فمن وجهة نظرى ان التدوين فى مصر انقسم الى مرحلتين هما ما قبل 6 ابريل وما بعد 6 ابريل فقبل ذلك اليوم لم يكن الكثيرين يعرفون ما هو التدوين ومن هم المدونين وما هو ذلك الشئ المسمى بالفيس بوك وبعد احداث ذلك اليوم والهجوم المصاحب على المدونين والفيس بوك علم الناس بوجود هؤلاء الناس المنبثقين منهم المنتقدين للسلبيات فى المجتمع بأسلوبهم الساعين الى تغيير المجتمع للأفضل ولكن ما مدى تأثر الناس بهؤلاء .

هناك من رأى فيهم الأمل فى ان يفعلوا ما لم تستطيع الاجيال السابقة فعله وهناك من لم يتأثر بأى شئ سوى ان هؤلاء الأشخاص معارضين للحكومة ولذا توجب الابتعاد عنهم وذلك رأى مجافى للحقيقة فليس كل المدونات تكتب فى السياسة بل انى ارى ان الاساس فى المدونات الوجهة الاجتماعية والانسانية .

فإلى اى اتجاه يسير التدوين والمدونين فى مصر ؟

حالة

سؤال جه فى دماغى مرة واحدة قولت اشركم فيه يمكن الاقى اللى يريحنى

هو ليه كتير بنحس اننا مضايقين ومخنوقين من حد فى حياتنا ولما بيحصله اى مكروه بنلاقى نفسنا اول ناس نجرى عليه ونحضنه ونبقى مش عايزين نبعد عنه نع اننا كنا لسه بنقول احنا مش عايزين نقربله .

فكرت واحترت كتير لقيت ان الحب جوانا مزروع ومش ممكن نشيله ابدا دى الطيبة والحنان هى اساسنا .

زمان سمعت عبارتين اتيقنت منهم دلوقتى ( عمر اللى يحب ما يكره / مفيش حد بينجرح قوى الا لما يحب قوى )

فكرت ومعرفتش اوصل لاجابه هو الحب ليه جوانا مزروع ومش قادرين نمحيه دى حاجة لقيت انه دى حاجة مش بنتحكم فيها .

ملحوظة ( انا مش بالضرورة بتكلم عن حب واحد لواحدة انا بتكلم عن حب كل الناس لكل الناس )

كلام فى البورصة واجابة تاج الاحلام

أولآ : موضوع البورصة

تحديث : البورصة فتحت من تانى يوم الجمعة

للأسف لما وصلت البورصة لقيتها مقفولة وسألت هو فى ايه قالولى البورصة اتشمعت طيب ليه سمعت كلام عن خناقة ضربت فيها واحدة من اللى قاعدين عقيد شرطة كان جاى يقفل القهاوى اللى فى البورصة تبع البلدية يعنى .

المهم روحنا قعدنا فى زهرة البستان وكان تجمع كبير للمدونين بس مقدرناش نفتح النقاش لا انا ولا خالد ولا حتى سوو والصباغ لانه لما يبقى فى 30/35 مدون كلهم بيتكملوا فى نفس الوقت فمجتش الفرصة لكننا اكيد هنحدد ميعاد للمناقشة فيما بعد بحيث انه برضه يتوافق مع ظروف الناس اللى اعتذرت .

ثانيا : التاج ( تاج الأحلام )

انا كنت نوهت انى وصلنى تاج من شهرزاد صاحبة مدونة رسائل الى القمر اسمه تاج الاحلام والتاج ده بيقول ايه

1- أذكر أحلاما تخص ماضيك كنت هتتخلى عن إيه فيها و هتتمسك بإيه لحد دلوقتى

مش هقول الحلم مات جوايا من زمان لكن لسه بحلم . اه بحلم بس من غير امل يعنى بحلم علشان متخنقش زمان حلمت بالحب وراح ويا حبيب خان العشرة وحلمت بالصديق وغدر بى كتير لكن يمكن لسه الحلم ده موجود جوايا لما لقيت المدونين . حلمت بالحضن اللى يضم من غير ميقول انا مصلحتى ايه وضاع منى مع ناس كتير . حلمت انى اكون انا مش غيرى ولسه محققتش ده بس لسه متمسك انى اكون ذاتى مش مرايا لغيرى من الناس .

2- أذكر احلاما تخص مستقبلك وما تتمناه منه

بحلم بالخير يملا القلوب ويرجع الحب بتاع زمان لما كان بين الناس مودة وحنان . بحلم انى يكون لى اصدقاء بجد يحبونى ويخافوا عليا وانا كمان احبهم واخاف عليهم . بحلم انى احقق ذاتى فى ارض صلدة صعبة المراس .

3- أذكر شخصين على الأقل متواجدين فى حياتك كنت تتمنى وجودهم من قبلهم

الشخص الأول : مجموعة المدونين اللى اتعرفت عليهم واثروا فيا

الشخص الثانى : توأمى نضال اللى اتعرفت عليه من خلال التدوين وهو بجد من الناس اللى بعزها وبحترمها جدا

الشخص الثالث : احمد الصباغ من الناس اللى كنت بتمنى اقابلهم من زمان

الشخص الرابع : سو وده بالذات واحد من الناس اللى اثرت فيا جدا بسخريته المعتاده

الشخص الخامس : خالد من الناس الطيبة جدا اللى كنت بتمنى وجودهم فى حياتى من زمان

الشخص السادس : آبى من العقليات التى تحترمها وتستفيد منها جدا

4- أذكر شخصين على الأقل غير متواجدين فى حياتك و تتمنى وجودهم مستقبلا فى حياتك وحياة اولادك

الشخص الأول : حبيب يصون ولا يخون يكون هو الامان شريك الحياة

الشخص الثانى : ناس مليانة قلوبها طيبة وحنية عمرها ماتكون أسية

اخيرا بمرر التاج لـــ

1- نضال

2- بنت خيخة

3- خالد عثمان

4- وومن

5- المجنى عليها

فاصل مع البورصة كافيه وتاج الاحلام ونواصل مع after mid night

اول مرة يجيلى تاج ومن مين من شهرزاد صاحبة مدونة رسائل الى القمر
انا هجاوب التاج بس مش دلوقتى استنوا الاجابة فى البوست اللى جاى
ودلوقتى فى تنويه عن البورصة كافيه

بكرة الخميس فى اجتماع للمدونين هطرح فيه انا و خالد صاحب مدونة همس الاحباب مجموعة من الاقتراحات لتفعيل دور المدونين فى المجتمع اتمنى حضور كل من يستطيع هنكون فى البورصة من الساعة 6 الى الساعة 12 بالليل .
ياريت لو كلكم تيجوا وتشاركونا باقتراحاتكم وارائكم واللى مش عارف العنوان هو سهل ميتوهش
ميدان طلعت حرب - ش علوى - كافيه البورصة بجوار شركة صفا للاستيراد والتصدير
وده كمان رقم تليفونى للى يحب يجى ومش عارف يوصل 0107634616

تقبلوا تحياتى جميعا

After Mid Night الجزء الثانى

اولا احب ان اوضح بعض النقاط من البوست السابق :-
1- الموضوع حقيقى 100%
2- بالنسبة للقصص انا منزلها علشان نعرف عالم غريب علينا نستفيد منه ونعرف ازاى الناس دى بتوصل لكده
3- بالنسبة للصور انا مش هقدر انزل باقى الصور اللى معايا علشان منروحش شارع الحرية اولا وعلشان اباحيتها ثانيا يعنى مراعاة لمشاعر الآخرين
4- بالنسبة لشغل السابينس فده شئ مش مقصود بس علشان مطولش عليكوا فى البوست وبعدين دول 6 قصص كل واحدة ممكن تاخد حلقتين او تلاتة على الاقل وبعدين يا عم سو لازم التشويق شوية

احنا توقفنا فى الجزء السابق عند ذهاب البنت للنوم فى منزل جارة صديقتها والآن نستكمل معا باقى الحوار لنعرف ماذا حدث لها فى صلاة الفجر .
هى: لم أفكر فى شئ آخر بل ذهبت للنوم لانى كنت مرهقة جدا وبعدما ذهبت فى النوم فوجئت فى منتصف الليل بزوج جارة صديقتى يوقظنى من النوم بحجة أن صلاة الفجر قد حانت وطلب منى ان اقوم اتوضأ الى ان يحضر لنا حاجة نشربها وقالى علشان تفوقنى علشان اقدر انزل اصلى معاهم وتركنى وذهب قمت توضأت ونظرت الى الساعة فوجدت ان ميعاد الفجر مازل عليه الكثير ليس اقل من ساعة ولكنى لم افكر وتوضأت وخرجت الى الريسيبشن وجلست فى انتظارهم واتى وهو يحمل معه كوبين من عصير لونه غريب وشربت وبعد ان شربته احسست باحساس غريب وهو ازدياد الرغبة الجنسية عندى بطريقة فظيعة و جلس بجانبى وطلب منى ان اقص عليه روايتى مع انى قصصتها على زوجته واعتقد انها قصتها عليه بالتأكيد ولكنى قصصتها عليه فكنت اريد الكلام مع اى انسان وعند وصولى لفترة زواجى قام بحجة احضار كوب آخر من العصير علشان يقدر يستوعب وفعلا اتى بكوب آخر وكانت خطيئة عمرى انى شربته من غير تفكير وبعد شربى العصير بدأ يستوقفنى ليسأل فى نقاط شديدة الحساسية فى الزواج ولكنى كنت تقريبا مغيبة عن الوعى ولكنى ارى ما حولى جيدا الى ان فوجئت بانى بين احضانه وقضينا ليلة كانت حمراء بالطبع ومن بعدها ظلت العلاقة بيننا فترة من الوقت الى ان تعودت على شرب كوب العصير يوميا وكنت انا من اطلبه منه وبعد مرور شهر تقريبا قال لى انه اخذ شقة قريبة حتى نلتقى فيها بعيدا عن زوجته التى لم اكن اراها كثيرا ولم اسأل عنها وبعد انتقالى للشقة الجديدة بدأ يجلب لى اصدقائة بحجة انى اساعده بذلك فى انهاء اعماله وكان يترك لى المال الوفير الى ان استولت على المخدرات ولم اعد افكر فى اى شئ اخر سوى المخدرات والجنس والمال وبعد فتره اختفى ولم يعد يأتى وعلمت انه غير سكنه القديم فعملت فى احدى الكازينوهات الشهيرة فى شارع الهرم لفترة ثم انتقلت الى كافيه فى المهندسين ومازال بى الحال كذلك الى ان اتيت انت اليوم .
انا : انتى كده مش حاسة انك اهدرتى كرامتك كانسانة يمكن بدون وعى منك بس انتى بقيتى زى التاكسى الكل بيركب فيه لحد ما ينزل المكان اللى هوه رايحه بعدين مش بيشوفه تانى فمش هيهمه التاكسى ده كويس ولا وحش .
هى : نزلت دموع عينيها التى لم استطيع احتمالها وقالت انا باستغراب
انا : نعم انتى عموما لسه الفرصة قدامك تكونى انسانة وترجعى لنفسك من تانى انا بشتغل فى مجال السياحة واعرف شركات سياحية محتاجة سكرتيرات وممكن تشتغلى فى كده ومرتبها بيكون كويس يكفى معيشتك بكرامة لو حبيتى تكونى انسانة وترجعى كرامتك من تانى انا ممكن اساعدك بس المهم انك تكونى مقتنعة بانك دلوقتى غلط ولازم تراجعى نفسك
هى : انا كنت محتاجة من زمان للى يقف جنبى ويساعدنى بجد للى يفوقنى من اللى انا فيه مش اللى مش بيشوف فيا غير جسمى وبس
انا : وانا قولتلك لو حبيتى اوكى
هى : ثوانى ارجوك متمشيش لحد مارجع . دخلت جوه جابت الشنطة بتاعتها وحاجتها ونزلت معايا راحت شقتها فى انتظار تليفون منى

وبعدين كلمتلها حد صاحب شركة ونزلت اشتغلت معاه ومن يومها مشفتهاش تانى بس لما سألت عليها عرفت انها اتجوزت امير خليجى وعايشة هنا فى مصر وحققلها اللى لو كانت اشتغلت طول عمرها مكانتش هتعمله لا بالحرام ولا بالحلال .

دى كانت اول قصة لسه فى قصص تانى استنوا البوست اللى جاى قصة على عكس دى تماما

After Mid Night ( موضوع للكبار فقط ) الحلقة الاولى

الحلقة الأولى

عالم آخر احسست بداخله كأنى انتقلت الى كوكب آخر غير عالمى الخاص . عالم ظاهره ملئ بالفرح والابتعاد عن الهموم والمشكلات التى نعانيها الا انى وجدت فى باطنه العذاب لمن هن بداخله ويعملون فيه داخلهم احلام ماتت وقصص لو رأيناها فى اى فيلم سينمائى مهما كانت عبقرية وواقعية القائمين عليه لما صدقناها . عالم يبيع فيه الجميع نفسه لاجل المال لاجل الشهوات عالم تهدر فيه كرامة الانسان بكل سهولة .

حملت معى قصص واقعية حدثت امامى ومعى شخصيا لفتيات يعملون فى ذلك العالم البعيد عنا . علنا نعلم كم تعانى تلك الفتيات وما الاسباب التى دفعتها الى الخوض فى ذلك العالم القاسى . ما احمله معى يحمل جزء معين فى تلك الحياة الا انه هناك من دخلن ذلك العالم بكل ارادتهم .

ولنبدأ بأول قصة واجهتها وهى التى دفعتنى لخوض ذلك العالم ومحاولة معرفة اسراره .

فى احدى الليالى فكرت فى زيارة صديق لى وذهبت اليه بالفعل ولكنى بمجرد دخولى مسكنه وجدت بداخله ما اشبه بالسوق حيث هناك من يفترش الارض ومن يجلس فى كل مكان وامامهم كل انواع المكيفات فاستغربت جدا حيث ان صديقى هذا لم له فى كل ما رأيته فآثرت الانسحاب ولكن ما ان فكرت فى الدوران للخلف والخروج من ذلك المكان . وقد فوجئت ببنت تسحبنى من ذراعى وهى تترنح من كثرة الشرب وتقول لى .

هى: رايح فين مش هتقضى الليلة معانا

انا : بكل اندهاش من موقفها . لأ انا ماليش فى الشرب ولا فى الحاجات التانية دى

هى : امال ايه اللى جابك . بغيظ

انا : اللى جابنى انسان كنت زمان بحترمه لكن للأسف يظهر انه راح وسط زحمة الحياة

هى : بكل اندهاش معناه ايه كلامك ده

انا : معناه كبير مش هتقدرى تفهميه وانتى ضايعة وغرقانة فى بحر مالوش آخر

هى : تركتنى وجرت الى الحمام وتركت الماء تنساب على رأسها علها تفوق مما هى فيه

ثم خرجت وقالت لى اريد ان افهم ما قلت

انا : طيب انا اقولك بس ممكن تحكيلى ايه السبب اللى حولك لبنت ليل ومش بتفوقى من المخدرات علطول وبعدها افهمك ايه اللى انا قولته

هى : جلست على اقرب كرسى وسرحت بعيدا كمن يتذكر ايما يرجو ان تعود ولا يتمنى عودتها فى نفس الوقت .

انا : اقتربت منها وقولت لها متسكتيش السكوت بيموت الانسان اتكلمى واحكيلى يمكن اقدر اشيل عنك حاجة وبعدين انتى مش هتخسرى

هى : نظرت لى بعيون حزينة وقالت لى من يوم ولادتى وانا وحيدة فى دنيا العذاب لقد تألمت كثيرا فلم اعرف لى اما فقد توفت والدتى وهى تلدنى وبعدها بثلاث سنوات وانا مازلت طفلة توفى والدى وتركنى لزوجته التى تزوجها من بعد امى فلم يكن لى اى اقارب غيرها وهى منذ وفاة والدى وهى تسقينى من كأس العذاب الى ان اكملت الثالثة عشر من عمرى زوجتنى الى ابن اخيها حتى تستولى على ميراثى .ابن اخيها ذلك كان عمره 28 عاما وكان متزوج ويقيم فى احدى دول الخليج واتى ليأخذنى بين يوم وليلة وأخذنى الى هناك حتى اعمل خادمة لزوجتيه ولم اعرف اى معنى لحياتى حتى اكملت السابعة عشر من عمرى وان اتذوق كل يوم الاهانات . وعدت الى مصر بعد عذاب واستجداءات كثيرة وشكوت لزوجة ابى وطلبت منها ان تطلقنى منه ولكنها قابلتنى بأقذع الالفاظ وطردتنى من بيتها الذى هو بيتى انا بالأساس فلم اجد امامى اى طريق سوى ان اسافر القاهرة على اجد صديقة لى هناك تعرفت عليها فى الخارج . ذهبت وبعد معاناة توصلت الى منزلها ولكنى وجدتها مازالت فى الخارج ولم تأت . فماذا افعل فى ظلمة الليل وانا لا اعرف اى شخص فى تلك المدينة الكبيرة جلست على احد الارصفة بالقرب من بيتها ونظرت الى السماء وافكر ماذا افعل ونظرت ناحية مسكنها وجدت جارتها التى اخبرتنى بعدم وجودها تراقبنى من شباكها فماذا افعل .

وانا مازلت افكر اذا بجارتها تأتى الى جانبى وتطلب منى الذهاب معها الى مسكنها والمبيت معها الى الصباح ولم يكن امامى الا الذهاب معها وانا لا ادرى ما يحاك من خلف ظهرى وطمأتنى بأنه لا يوجد غيرها هى وزوجها . وحضرت لى غرفة مستقلة وتركتنى لأنام .

انتظروا فى الحلقة القادمة ما يحدث لها فى صلاة الفجر

مدون وكمان بتقعد على البورصة ( يالهوى )

بوست فكرت اكتبه من زمان يمكن اتأخرت كتير قوى فى كتابته بس كان لازم اكمله هو يمكن انهارده ناقص شوية لكن هو ده اللى جه فى دماغى طبعا كان فى حاجات كتير بس ضغط الشغل كفيل انه ينسى اى انسان اسمه .نيجى للبوست بقى .

منذ بدأت حياتى التدوينية فى عام 2005 مع مكتوب كان لى حلم اراه فى التدوين بخلاف الحرية الشخصية والكبت الفكرى الذى نعيشه .

دخلت مرحلة التدوين وانا تائه خارج من جراح حطمت الكثير من روحى المعنوية فقدت الثقة فى الكثير من الناس إقتنعت بإنه لا وجود للصديق ولا حتى الحبيب وفى ظل تلك الظروف دخلت التدوين لأكتب ما بداخلى وجدت عالم آخر بخلاف ما تخيلت وبدأت الرحلة وحملت حلمى معى وهو التقاء كل الاتجاهات الفكرية فى بوتقة واحدة تجتمع على هدف واحد مهما كان الخلاف فى الفكر والرأى .

كان معى حلمى تواصل مع اناس اختلف عنهم وقد اتفق .

كان حلمى ايجاد ثقافة حوار هادئة مختلفة عمن نراه على صفحات الجرائد سواء قومية او معارضة او مستقلة تختلف عمن نراه على شاشات الفضائيات والشاشات القومية من نقاش حاد يقترب احيانا الى اسلوب همجى اقرب منه اختلاف موضوعى فى الرأى .

دخلت مكتوب وتعاملت مع عقليات مختلفة ولم يتحقق حلمى على مدار سنتين فى مكتوب بل ذادت جراحى جراحات اكثر .

وآتى يوم ما بعد اعتزالى التدوين وتقابلت مع ابن بلدتى وجارى الذى لا اعرفه ( حماده زيدان صاحب مدونة من اول السطر ) وعرفت منه عن البلوجر واقترح على لقاء مدونين آخرين اتأثر بهم وقد اؤثر فيهم .

واتيت الى البورصة وتعرفت على الصديق الجميل ( احمد الصباغ صاحب مدونة خالو احمد الصباغ ) وبدأ الحلم يقترب ولكنه مازال بعيدا فى نفس الوقت لماذا لا ادرى .

وغبت لفترة بسبب مشكلات فى العمل ومشقة السفر من المنيا الى القاهرة ثم عدت لأتقابل مع المدونين وحيدا وتعرفت على شخصيات جميلة عوضونى عما فات من عمرى من احزان فمعهم تحقق 50% من الحلم واتخذت منهم الاصدقاء القريبين الى جدا مثل ( نضال صاحب مدونة نضال فلسطين ) وتعرفت على البنوتة الشقية ( أبى صاحبة مدونة كوكب آبى ) والكثير جدا من المدونين الذين لا يحملون داخلهم الحقد والضغينة بل يجمعهم هدف واحد الاصلاح - حب مصر وليس بالضرورة ان نتخذ كلمة الاصلاح بمشتقها السياسى فقط بل هناك الاصلاح الاجتماعى والاقتصادى والثقافى .

استفدت كثيرا من الاستاذ ( احمد على صاحب مدونة يوميات عيل مصرى ) بالرغم من غيابه عن المشاركة التدوينية فبدون البورصة كان من الممكن الا استمتع بالاستماع اليه والاستفادة من خبراته العريضة .

الا انه فجأة خرج من ينعت المدونين بانهم شوية عيال لاسعة ومالهومش لازمة ومن يقول لابد من محاكمتهم محاكمة عسكرية ( على اساس انهم ناس من عالم تانى محتلين البلد وسارقينها وناهبين قوتها ) .

وبعدها بفترة خرج من ينعتهم بالمندسين الا ان ذلك كله لم يؤثر بل زاد الاصرار والعزيمة على المضى قدما فنحن ابناء هذا الشعب منه خرجنا لا نبغى مصلحة شخصية ولا نريد كرسى حاكم بل نريد العدل . الا انه الطامة الكبرى كانت بخروج احد المدونين الذين لا يعتبروا من المدونين باتفاق اراء الكثير ليصف الاناث المدونات بانهم لديهم كبت ( وطبعا مكنش يقصد الكبت الفكرى كان يقصد حاجة تانية ده على اساس انهم عينوه خبير نفسانى فى فهم شخصية المدونات الاناث ) .

ووجدت من يهاجم جلسة البورصة بان من يجلس عليها رايق ليست لديه مشكلات وهناك من قال كلها مشكلات .

وانا من هنا ادافع عن ذلك المكان الرائع الذى وجدت فيه ما قد ضاع منى ولم اجده فى اى مكان آخر قد يكون لتواصله بشريان مصر ( النيل ) او وجوده فى قلب مصر وعبقه التاريخى لا استطيع ان احدد .

ولى ان اذكر احدى مواقف البورصة التى تدل على فكر وهدف من يجلس على البورصة .

بعد انتهاء احدى الجلسات وكنت جالس انا وسو وآبى فى انتظار حضور اسلام خطيبها ( على فكرة اسلام من الشخصيات المميزة جدا بجد مبروك لآبى اسلام ومبروك لاسلام آبى هما الاتنين لايقين على بعض قوى ) واحنا بنتكلم عن جيران آبى وعن بطوط ( اكيد كلكم عارفين بطوط ) ذكرت آبى موقف حدث لاحد جيرانها وطلبت منا لو نستطيع مساعدته وقد كان اما بالنسبة للموقف فقد كان ان احد جيرانها كان لديه تاكسى يعمل عليه وباعه ليشترى سيارة ملاكى احدث موديل ليؤجرها ويستريح من عناء العمل وطبعا اشتراها بالتقسيط وبقى على فيض الكريم .و أجر العربية لناس تقريبا عملوا بيها حادثة بهدلتها وخلعوا .

الراجل جتله صدمة عصبية وبقى مش بيتحرك ولا بيتكلم لكن بعض الجيران ممن باق داخل قلوبهم الخير وحب الناس اصلحوا له السيارة ولكنه مازال لا يتكلم وطلبت منا آبى لو نعرف شركات سياحية تؤجر منه السيارة ويعمل عليها سائق وكان امامى احدى الشركات وقولت لآبى لكن المشكلة انهم كانوا مستعجلين والراجل مش بيقدر يتكلم ونحن فى انتظار ان يمن الله عليه بالشفاء من تلك الصدمة العصيبة وسنحاول مرة من بعد مرة الى نستطيع ان نفعل شيئا له .

الغرض من ذلك الموقف هو انه لو لم نجلس على البورصة ونجتمع على هدف هل كنا نستطيع ان نعرف بحكاية ذلك الرجل ونحاول مجرد المحاولة مساعدته .

هناك موقف آخر وهو الاجتماع فى يوم والتبرع بالدم وقد كان من قبل ان انضم اليهم هل كان هناك من يفعل ذلك .

اخيرا انا لا اقول ان التدوين والبورصة كلها ايجابيات وخالية من السلبيات لا فهناك العديد من السلبيات ولكنا نستطيع تحويلها لايجابيات وفى النهاية اشكر كل المدونين الذين تقابلت معهم وسعدت بهم او لم اتقابل معهم واسدوى الى النصح فى الكثير من المواقف واتمنى ان يجتمع الكل على هدف واحد وهو حب مصر - الاصلاح بلا تخريب - عدم التطلع الى اى منصب او كرسى باعتباره الغاية والمراد الاسمى .

صوت الكروان أذينة العلى

كروان يعزف احلى انغام الهوى
واجملها
على اوتار الحزن يعشق
يغنى
يعرف متى يدخل القلوب
كروان
يتغنى بأعذب الكلام
فسلمى .. حبه
وهاجر ..عشقه
غنى وقال
لما هجرتينى
فكانت أعزوفة
على اوتار العشق
يعزف على الناى
اروع الحانه
فهو
غناء كالليل الحزين
ينتظر بسمة الفجر
يولع دوما بالكلمة الفتانة
التى تفتك بالقلوب
وتحيى آمال المحبين
انه
علي فى كلامه
علي فى الحانه
على فى غناءه

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

للإستماع إلى أغنيات أذينة العلي
إضغط على الروابط ادناه
http://www.6rbtop.com/download.php?song_id=23588&type=au&q=hi
سلمى
http://www.6rbtop.com/download.php?song_id=22180&type=au&q=hi
هاجر

حوار بين عروسين

فى ليلة من ليالى عمرى

كان القمر طالع بدرى

شفتها بعنيا

خدت قلبى وعنيا

غرقت فى بحرها

ولا اقدر يوم على بعدها

دى كل احلامى اللى فات

منها واللى آتى

.................

فى ليلة من ليالى عمرى

كان القمر طالع بدرى

رمانى بسهم عينيه

مس قلبى بحنان ايديه

سحره فى كلامه

هو ماضيا وهو اللى جاى

..................

فى ليلة من ليالى عمرنا

كان القمر طالع بدرى

بدينا قصتنا

قرينا فاتحتنا

قدمنا خطوبتنا

لبسنا شبكتنا

واستنينا

تكمل حكايتنا

فى زفافنا

نكتب كتابنا

وسط صحابنا

وحبايبنا

أطفال الشوارع مأساة حضارية فى الألفية الثالثة ( ماذا نفعل لهم ؟ )

أولا أود ان أضع تعريف لأطفال الشوارع وأعتقد على اننا كلنا متفقين على انهم ( الاطفال الذين لا يوجد لديهم مأوى وبدون اسرة ويعيشون فى الشوارع ) .ثانيا اطفال الشوارع هم هم نتيجة للعديد من المشكلات الاجتماعية مثل ( التفكك الاسرى – الطلاق – الاغتصاب – العنف – الزواج العرفى ) وما الى اخره من مشكلات مجتمعية ولهم العديد من المشكلات الناتجة عنهم كإذدياد معدلات الجريمة بشكل عام بالإضافة الى الزواج العرفى والاغتصاب والشذوذ .كلنا نتذكر زيارة ( زين الدين زيدان ) الى القاهرة من فترة قريبة للاحتفال بوجود مصر لأول مرة فى كأس دانون الفرنسية للأطفال والحفلة التى أقيمت وشارك فيها ( حكيم ) بالغناء وبالنظر الى الفكرة التى أقيمت على اساسها تلك الكأس وهى رعاية الاطفال وتقديم الدعم لهم تولدت لدى فكرة ما قد تكون صعبة بعض الشئ ولكنها ليست مستحيلة .

فكرتى تقوم بالأساس على نفس فكر الشركة الفرنسية وهى انشاء جمعية اجتماعية فى كل مؤسسة اقتصادية وينشأ فيها دار لرعاية الاطفال المشردين وتعليمهم حرفة قد تكون فى نفس مجال عمل الشركة وترعى الاطفال من هم دون العاشرة او الخامسة عشر وتعمل على تعليمهم تلك الحرفة ورعايتهم رعاية تامة الى ان يصلوا الى سن الواحد والعشرين وبعد تلك السن امامهم حل من اثنين تركهم للعمل بالخارج او العمل داخل الشركة وهناك من يقول وماذا يجبر تلك المؤسسات على تلك المصروفات التى لا تعود عليهم بأرباح فيكفى تقديم المساعدات الى هؤلاء الاطفال فقط ولكنى اعتبر ان المسئولية مشتركة ما بين(رجال الاقتصاد والدولة ممثلة فى الحكومة ووجود الدعم الشعبى تجاه تلك الظاهرة ووجود الجلول الاجتماعية التى تقضى على تلك الظاهرة تماما)ولذا سأتكلم بوجهة نظر إقتصادية بحتة لرجال الاقتصاد فالمؤسسة التى ستنفذ تلك الفكرة ستضع فى بند مصروفاتها مصروفات زائدة مخصصة لتلك الظاهرة وهى مصروفات تذهب لا تعود عليهم بأى ارباح فى المستقبل القريب ولكن بنظرة بسيطة للمستقبل البعيد فعند وصول هؤلاء الاطفال الى مرحلة الاعتماد على النفس يكونوا قد تعلموا الحرفة التى تعمل الشركة فى مجالها وليكن مثلا ( شركة تصنيع تليفزيون هى الراعية وتعلمهم كيفية تجميع وتصنيع التلفاز ) فبعد تعليمهم وعند وصولهم لسن الواحد وعشرين قد تكون الشركة محتاجة الى احلال عمالة وتجديد دماء فى العمل فينتفعون بهولاء الشباب بذلك يكونوا قد حققوا الربح فى المستقبل البعيد .اما بالنسبة للدولة بشقيها الحكومة والمجتمع المدنى فوجود هؤلاء الاطفال فى مكان يجمعهم ويغيرون حياتهم سيقلل من المشكلات الناتجة عن وجودهم فى الشارع فمثلا ( معدلات الجريمة ستكون فى انخفاض فبدلا من نسبة 80% ستكون 30% بالاضافة الى اكتساب عقول وخبرات جديدة . اخيرا بعد عرض الفكرة اتمنى من كل المدونين المشاركة بأفكارهم وارئهم وتوصيل الفكرة الى كافة المستويا ت فى المجتمع المدنى حتى يكون هناك اجماع شعبى على تلك الظاهرة والتوعية بمخاطرها والاسباب التى ادت الى وجودها فى مجتمعاتنا .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ملحوظة اخيرة ( اشكر الاخت العزيزة آبى على تشجيعى وإقراحتها المثمرة )

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

إضافة من عند آبى :-

ـــــــــــــــــــــــــــــــــــــ

آبى ترى انه لابد من اننا نساعد هؤلاء الاطفال بالمال حتى وان كان قليل والتقرب منهم حيث انهم بطبعهم يخافون ممن ليس بحالهم وبالتالى لابد من التقرب اليهم بحيث نحببهم فينا وبذلك نستطيع ايجاد بعض التأثير عليهم ومساعدتهم بحق .

إنتظروا آبى قريبا ستشرح فى بوست مفهومها وفكرها واتمنى المشاركة من كل المدونين .

إقتراح على السريع :

انا بقترح نحدد ميعاد ونجتمع كمدونين وكل مدون يشرح فكرته ويقول رأيه فى انه ازاى نحول الحلم لحقيقة ونساعد هؤلاء الاطفال ونحولهم لاعضاء نافعين فى المجتمع .

موالى

البداية كانت بسؤال ( ايه هو الحب ) والاجابة لقيتنى بقولها بإحساسى < الحب عذاب للروح وصفاء للقلب ونقاء للعقل > بس هو( ليه الحب مرتبط بالجرح جوانا ) يمكن علشان جرحه مش زى اى جرح يمكن علشان جرحه قريب قوى وبعدين مفيش حد ( بيحب قوى الا لما بينجرح قوى ) طيب راحت فين المودة وفين التسامح كان زمان الحب فرح فى زمن كانت الناس من جواها الطيبة والحنان دلوقتى فى

< زمن رمش العين > بقى كله جرح والناس بتضيع بيه وقت .

وكان اللى بعده ( انت مين ) وكان جوابى انا اللى تاه بين الايام بيدور على اللى راح منه زمان . كنا زمان تلاته انا والصديق والحبيب .

الصديق غدر وخان والحبيب ضاع فى زحمة الايام وفضلت انا لوحدى ادور بين الايام على ( لمسة حنينة تمسح دمعى وكلمة طيبة تداوى قلبى عشت بين الجراح من جرح لجرح ) وانا بقول إمتى الايام تعود لى باللى راح لكن لا الزمان بيرجع ولا الدمع بيسكت وبيقت انا اللى تايه بين الايام بيدور على اللى راح منه زمان وكتبت موالى يمكن يداوى الجراح .

الحب كان زمان

عشرة وحنان

كان الصديق

والحبيب كمان

الصديق

غدر وخان

ولا عمرى صان

الحبيب

تاه مع الايام

بيدى لغيرى الحنان

وسابنى محتاج للأمان

انكسر القلب

ونزل الدمع

بلون الدم

وقولت اكيد

انا غلطان

سلمت لخاين

ضيع عمرى

فى الاوهام

زمان

كنت انسان

فى الحياه

لكن

القلب مات

والحب ضاع

ومعاه راح

الانسان

آاااه و آاااه منك يا قلم

آاااه و آاااه منك يا قلم
تكتب أحزانى
وتكتب أفراحى
تذكرنى بذكريات مضت
ترمينى للأحلام
وترسلنى للجحيم
وتعود بى للجنة
آاااه و آاااه منك يا قلم
توصف إحساسى
وتعيش مشاعرى
ومين غيرك يقدر يفهمنى
عند أول دقة فرح
الاقيك اول واحد قدامى
فرحان معايا
وعند أول دمعه حزن
الاقيك ويايا تمسحلى دموعى
آاااه و آاااه منك يا قلم
فرحك قليل
دمعك بحور
آاااه و آاااه منك يا قلم
جرحتنى
وجراحى جرحتك

مهما سافرت بعيد

سافرت بعيد

بقلبى وحيد

جربت احضان كتير

ولا يوم لقيت غير

حضنك يضم

لفيت كتير

ولا يوم حسيت

بغير حنانك

انتى الحنان والامان

سافرت بعيد

بقلبى وحيد

وحواليا كتير

ولا يوم شفت غيرك

وحيد واحزانى بتقتلنى

ولا حد داوانى

غير حضنك

انتى فى قلبى وجوه كيانى

مهما سافرت بعيد

حبك مولود جوايا ولا يوم راح يقل

مهما سافرت بعيد

ولا حتى لو حواليا كتير

عمرى ماهحس غير

بحنانك

وضمتك ليا

هيا الامان ليا

يا بلدى .. يا مصر

لا بلاد الدنيا تنسينى ناسك

ولا بحور العالم تروينى

غير نيلك

الطيبة والسلام ويا

الحنان والامان

فين الاقيهم

غير جوا احضانك

يا بلدى .. يا مصر

يا ام الدنيا

كلمات صريحة

إلى جريدة الأهرام :-

كنتم يوما ما جريدة احترمها واتابع كتابها المحترمين يوميا ولكن منذ قيامكم بالحملة الشنعاء لمهاجمة شباب ال face book والتقليل منهم على كثرة عددهم فقدتم الكثير من احترامكم ككيان كبير .

إلى رفعت السعيد ( رئيس حزب التجمع ) :-

كنت نجما متألقا احببته واحببت حزك المتماسك بعض الشئ لكنك فقدت الكثير منذ وصفك ( شوية عيال مالهومش لازمة ) على شباب مصر المدونين ومشتركى ال face book فقدت الكثير .

إلى الاحزاب فى مصر :-

إنصعتم وراء الموجة الحكومية التى تقول ( مارسوا الحرية والديموقراطية كيفما شئتم ولكن من خلال الاحزاب والمؤسسات ) وانتم اعلم الناس انكم مجرد كومبارس ( للحزن الوطنى ) وضح نفاقكم للجميع .

إلى رئيس مصر :-

سيدى الرئيس مازلت تتدخل دوما لتصحح قرارت الحكومة الذكية فى الوقت الضائع وتضع المسكنات لتنصف اناسا اضاعتهم الحياة بين جدران تلك الحكومة الذكية فأين دور تلك الحكومة .
سيدى مازلنا نحترم ذلك الطيار صاحب الضربة الأولى فى حرب استعادة الكرامة ولكن رئيس الدولة مازال حوله اشخاص منتفعين من مناصبهم يعطوك دوما التقارير بإنه ( كله تمام ياريس ) ولنتذكر إن عبد الناصر كان دوما ينزل الشارع بين شعبه بدون حراسه .

إلى أحمد عبد الهادى ( رئيس حزب شباب مصر ) :-

وانت تتكلم باسم شباب مصر ولا ادرى من اعطاك الحق لتتكلم باسمهم نعم هناك مرتزقة فى السياسة والصحافة ولكن ليسوا من كنت تقصدهم فى حوارك مع الاهرام ودعوت لمحاكمتهم .

إلى أهالى دمياط :-

تحية من القلب لتلك الوقفة الصامتة التى اجبرت الجميع على احترام رغبتكم وكشفت المنتفعين من وراء تلك الشركة الاجنية