muah

MyHotComments.com

ابحث معى

6‏/8‏/2008

يااااااااااااه 19 يوم

fs انهاردة راجع ليكم من بعد غياب 19 يوم بسبب ظروف الشغل والبيت علشان كده ممكن يكون البوست طويل شوية لكن استحملونى انا هتكلم على يوم من اجمل ايام عمرى وهجاوب الامتحان اللى بعتتهولى الصديقة الجميلة شهرزاد .

يوم الجمعة 1/8/2008 اكيد كلنا فاكرينه اليوم اللى اطبق فيه قانون المرور الجديد بس انا مكانش مرتبط معايا بقانون المرور لأ انا ارتبط جوايا بحملة التبرع بالدم ونادى الزراعيين ( مع ان والدى مهندس زراعى الا انى اول مرة ادخله ) نزلت القاهرة من يوم الخميس الصبح ومنمتش ليلتها خالص مستنى ميرا ترن عليا الصبح علشان نروح مع بعض كنت عامل زى الاطفال الصغيرة ليلة العيد فرحان قوى انى هتجمع مع الناس اللى بحبهم انى هقضى معاهم يوم كامل وجه الصبح ونزلت روحت انا وميرا وشيكو وصلنا ودخلنا المركز علشان نتبرع ( مع ملاحظة انى مكنتش من المتبرعين ) وكان تجمع جميل جدا لناس كتير بحبها وناس اول مرة اشوفها بس كنت سعيد جدا انى شفتها زى احمد كمال والشنكوتى ونيجرو ودعاء مواجهات وايناس نهر الحب وشيماء الجيزى وشيماء فضفضة وفنانة مفروسة ورئيسة حزب الاحلام وشاهى ومهاميهو وضياء وبعد التبرع اشتغلت بطوط بتاعة ابى اسعاف كانت بتودى ضحايا التبرع على نادى الزراعيين وروحنا على صلاة الجمعة اللى اول مرة اصليها وانا مبسوط قوى طبعا البنانيت قعدوا فى نادى الزراعيين واحنا رحنا صلينا فى جامع جنب النادى واحنا راجعيين دار حوار صغير قوى بينى وبين ابو المدونين ابو خالد عن اختصاصى ومدى الاستهانة بمهنة الاخصائى الاجتماعى فى مصر مع الفارق بين الدول العربية والغربية وكان حوار جميل جدا حسيت فيه احساس غريب جدا حسيت انى بتكلم مع والدى بحنيته وطيبته وعقليته العظيمة .
بعد العودة مرة اخرى للنادى احتفلنا بعيد ميلاد سو ولماضة على خلفية طلقات مسدسات الصيد التى تأتى من نادى الصيد المجاور لنا وبعد وصلات الضحك على بعض المواقف الكوميدية اثناء الاكل طبعا انصرف البعض لظروفهم وفتحت ايناس نهر الحب نقاش حول موضوع اراه غاية فى الاهمية ( لكن لى رأى خاص ان الموضوع متمش طرحه بالصيغة الصحيحة وده اللى هشرحه بالتفصيل فى بوست قادم ) وكان الموضوع عن العنوسة بمفاهيم تعددت بمعنى الابتعاد الفكرى ما بين المتزوجين ومفهوم العنوسة لدى الناس ومعدلات الطلاق والزواج وتعرضنا لمناقشة فكرة غادة عبد العال ( انا عايزة اتجوز ) وفكرة جروب (عروسة من غير شبكة) على الفيس بوك وطال النقاش ولم يتم الاتفاق على صيغة معينة سوى تناول الموضوع محل النقاش فى بوستات منفصلة لكل منا مع ان ايناس كان لها افكار ( اراها بعيدة عن الواقع العملى بعض الشئ ) لكن النقاش فى مجملة كان شئ اكثر من الرائع .
واخيرا ما استفزنى بشدة انى تركتهم قبل انتهاء ذلك اليوم الرائع لالتزامى بارتباطات عمل فى المنيا وكان لزاما على ان اسافر مبكرا.وبذلك انتهى يوم من اجمل ايام عمرى .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثانى موضوع اجابة الامتحان بتاع شهرزاد:-

الامتحان بيقول ايه ---
بيقول اذكر ستة اسرار اللي يشوفنا لاول مره ميعرفهومش عننا :-

الاجابة بقى هتكون ايه :( يالا هغششكم طباعى وامرى لله )

1- عصبى

لما بشوف حاجة بتنرفزنى مع انى مش بيبان عليا كده خالص

2- كتوم

مبتكلمش كتير وبشيل احزانى لوحدى

3- رومانسى

كتير بيتعامل معايا بيحس انى لوح ثلج لكن لما بحب بحب باخلاص

4- بخاف من الفشل

يمكن ده بيدينى دافع انى انجح لكن كتير بيوقفنى مكانى

5- عنيد

كتير بعاند بس فى الاخر بيتضح انى كنت صح لكنى عموما محب انى اكون حر نفسى

6- مرح

كتير بيشوفنى بيقول انى خجول جدا ودايما حزين ودى فعلا صفة فيا لكن فى اول مقابلة بس والحزن شئ عادى بالنسبالى مصاحبنى دايما لكنى بحب الحياة والتنطيط

" عفوا لقد نفذت الاسئلة برجاء شحن البلوجر "
خلاص خلصنا وبالنسبة انا ههدى الامتحان ده لمين
انا مش ههديه لحد علشان الامتحان ده سهل قوى استنوا لما تيجى حاجة اصعب
هوزعها for free .

هناك 21 تعليقًا:

شهرزاد يقول...

الحمد لله على السلامة بعد غياب طويل عن مدونتك..

شكرا على إجابتك الجميلة.. امتحان سهل فعلا وقدأجدت الإجابة ..

ومش تتأخر علينا

تحياتي لك

بنت سيناء يقول...

قانون المرور طبق وأطبق على انفاس السائقين فى كل مكان

هيثم الكاشف يقول...

كان نفسي أكون هناك بس للظروف بقي :<
و ياهيثوم ألف حمدالله علي السلامه :)

Diyaa' يقول...

هيثم
معلش اتأخرت علشان أوصل مدونتك
أنا ضياء بقي يا جميل
ازيك ..أخبارك إيه
تعرف إني أول مرة أعرف إنك من المنيا..شفتك شكلك صعيدي وجدع بس افتكرتك مقيم في القاهرة أو نواحيها
حمد الله علي سلامتك وأنا هستني البوست القادم عشان أعرف رأيك وأنا كنت سعيد أوي أوي بمعرفتك ويا رب المرة الجاية نتكلم أكتر وكان يوم من أجمل أيام عمري برضه
اجابتك للإمتحان جميلة وليا زيارة تانية

خالص التحية ونورت القاهرة :)
ضياء

نهر الحب يقول...

السلام عليكم ورحمة الله وبركاتة
اسفة على التاخير كنت بجوب المحافظات لجلب مؤيديين للفكرة :)
اه بجد بس مش اوى يعنى
اولا انا شاكرة جدا اهتمامك وتذكرك للموضوع اللى انا طرحتة
حتى وان اختلفنا فى وجهات النظر دا شئ عادى جداا وصحى كمان جدا
ثانيا انا فعلا سعيدة جدا بالتعرف عليكم

ثالثا ان شاء الله الجحملة تنجح ونحاول نرتقى بفكرنا وثقافتنا الزوجية شوية
انا كمان كان نفسى تقعد اكثر لكن معليش
ان شاء الله 20/8 على شاطئ بورسعيد
حاول تنورنا اكون سعيدة جداا انا وجروب بورسعيد


سعدت جدا بالتعرف عليك

نهر الحب يقول...

بجد
ايجاباتك حلوة اوى على الاسئلة
انت شاب مصرى طيب بفكر جميل
ومتحضر ودا شئ رائع

نهر الحب يقول...

نسيت تقول انك خفيف الدم جداا
والدليل على كدة نقل ضحايا التبرع بالدم ببطوط ابى
اما بقى حكاية حريم دى فيارب ابى تسمعك
اعتقد انها رئفة بحالك هتخنقك بس
وانا معاها
ههههههههههههه

هيثم الدهشان يقول...

شهرزاد

الحمدلله على رجوعك بالسلامة من السفر ويخليكى دايما منورانى

تحياتى ليكى

هيثم الدهشان يقول...

الكاشف حبيب قلبى انا اسف جدا على المواعيد البايظة بتاعتى بس اعذرنى
كنت اتمنى تكون معايا

هيثم الدهشان يقول...

نهر الحب اكيد انا اسعد بالتعرف عليكى وفكرك الراقى جدا وان شاء الله هحاول اجى يوم 20/8
اشكرك جدا على كلماتك الرقيقة

وومن يقول...

هيثم

مش عارفة شكلنا كلنا جايين متاخر ولا ايه بس انا الجهاز كان في الطوارئ وعملولة نقل ويندوز

بس الحمد لله خرج من مرحلة الخطر واهو في النقاهة دعواتك

المهم وصفك لليوم يجنن وبجد انا كنت سعيدة بكل الموجودين

واجابات التاج دي صح جدا مش فاكرة مين قالك يوم التبرع اللي يشوفك
ميصدقش انت انت اللي بتكتب الكلام ده فعلا شكلك هادي جدا

انا طولت كفاية رغي بقي

خالص تحياتي

هيثم الدهشان يقول...

وومن

ولا يهمك المهم حمد لله على سلامة الجهاز وربنا يكمل شفائه على خير

ميرسى على كلامك الرقيق انا كمان كنت سعيد جدا بيكم

اللى قالى كده غالبا كان سووو

طولتى !!!! ولا يهمك ما هى المدونة بتعتك برده طولى براحتك ولا اقولك انتى ونهر الحب خدوا اشتراك مفتوح كل واحدة فيكم 3 تعليقات على كل بوست يالا هيصوا

نهر الحب يقول...

هيثم بك
ازيك يا مختلف معى فى وجهات النظر
بقى تختلف معى بعد الشرح دا كله ههههههههههههه
بص انا قلت اقولك ان الميعاد بقى الجمعه 22/8 ان شاء الله تعالى
فيارب تقدر تجى
تنورنا بجد

هيثم الدهشان يقول...

نهر الحب

ماشى ياستى بس ربنا يستر وميكونش حفل التوقيع بتاع الكتاب يوم الجمعة ساعتها مش هقدر اجى لكن لو غير كده ان شاء الله هاجى

رندا يقول...

هيثم

اسفة على التاخير معلش المرادى سماح
طبعا مش هقول ولا كلمة على التاج لان اى كلمة اقل بكتتتير من وصفك انت حد جميل اوى انسان بمعنى الكلمة انسان طيب ومش بتحب تتكلم لا على حد ولا فى اسرار حد
بجد انت الكل يفتخر بيك
وكان نفسى اوى اكون معاكوا فى التبرع بالدم علشان اتعرف على اجمل الناس
دة كان شئ يزيدنى شرف والله

كل الود لاجمل هيثم

رندا

هيثم الدهشان يقول...

راندا

ولا يهمك التأخير المهم انك تكونى بخير

انا مش عارف اقول ايه انتى كلامك الرقيق جميل قوى

يوم التبرع ظروفك مكانتش مناسبة انك تيجى لكن ولا يهمك الجمعه 22/8 هيكون فى تجمع الصبح علشان نجمع الملابس الزائدة عن حاجتنا ونوصلها للعشوائيات اتمنى تكونى موجودة

كل التحية والحب لأرق واجمل راندا

appy يقول...

نيهاها انا بحب كانون المرور وهبقى اقول ليه ههههههههههههه

ارجع بقى الا بقولك شوفت بطوط وهى بتقول اوعى الاسعاف ععععععععع


موضوع اللى اتفتحت راى زيك يا ريس ههههههههههه

appy يقول...

الا صحيح حريم فى عينك يا واد انت بس لما اشوفك ابقى خد لك ساتر بقى اسمها بنانيت يا واد انت

أحمد سلامــة يقول...

والله وصفك لليوم يا هيثم حسسني انه كان رحلة او مصيف مش حملة تبرع بالدم
واشهد ان دي اجمل حملات المدونين اللي قابلتها من ساعة ما عرفت التدوين لحد دلوقتي
واتمنى يكون في اجمل من كده دايما
الامتحان بتاعك انا كنت عارفة كله
وخصوصا عنيد دي
:)
سلام يا فنان

هيثم الدهشان يقول...

appy

بصى بقى علشان الخرفان بتوعك اللى شكلى هموتهملك انا غيرت الكلمة

بصحيح اعذرينى انى مجيتش الخميس بس انا عندى حبة مشاكل كده احلها وابقى اجى

هيثم الدهشان يقول...

احمد سلامة

واحشنى قوى واتمنى اشوفك قريب

والله هو بص تقول رحلة - مصيف - حملة كله يؤدى الى انى كنت مع ناس من اجمل الناس اللى عرفتهم فى حياتى

وبعدين بالنوسبة للاستمحان سعادتك خبرة وبعدين انت شكلك مش طب بشرى ( هههههههههههههه ) شكلها نفساويا

ميرسى قوى على زيارتك ياقمر

بحث مع دليل المدونين المصريين